ਪੰਜਾਬ ਸਰਕਾਰ ਜਲਦੀ ਹੀ ਸ਼ਹਿਰਾਂ ਤੋਂ ਪਿੰਡਾਂ ਤੱਕ ਯਾਤਰਾ ਨੂੰ ਸੁਗਮ ਬਣਾਉਣ ਲਈ ਮਿੰਨੀ ਬੱਸ ਸੇਵਾ ਸ਼ੁਰੂ ਕਰਨ ਜਾ ਰਹੀ ਹੈ। ਇਸ ਤਹਿਤ ਸਰਕਾਰ ਨੇ 100 ਮਿੰਨੀ ਬੱਸਾਂ ਖਰੀਦਣ ਦਾ ਫੈਸਲਾ ਕੀਤਾ ਹੈ, ਜਿਸ ਨਾਲ ਪੇਂਡੂ ਖੇਤਰਾਂ ਨੂੰ ਸ਼ਹਿਰੀ ਇਲਾਕਿਆਂ ਨਾਲ ਜੋੜਨ ਵਿੱਚ ਮਦਦ ਮਿਲੇਗੀ।
ਫਰਵਰੀ-ਮਾਰਚ ਤੱਕ ਸੜਕਾਂ ‘ਤੇ ਉਤਰਨ ਦੀ ਸੰਭਾਵਨਾ
ਸਰਕਾਰੀ ਸੂਤਰਾਂ ਅਨੁਸਾਰ, ਜੇ ਸਾਰੀ ਪ੍ਰਕਿਰਿਆ ਸਮੇਂ ਸਿਰ ਪੂਰੀ ਹੋ ਗਈ ਤਾਂ ਇਹ ਮਿੰਨੀ ਬੱਸਾਂ ਫਰਵਰੀ ਦੇ ਅੰਤ ਜਾਂ ਮਾਰਚ ਤੱਕ ਪੰਜਾਬ ਦੀਆਂ ਸੜਕਾਂ ‘ਤੇ ਦੌੜਣ ਲੱਗਣਗੀਆਂ। ਇਸ ਲਈ ਟੈਂਡਰ ਜਾਰੀ ਕਰ ਦਿੱਤੇ ਗਏ ਹਨ ਅਤੇ 23 ਜਨਵਰੀ ਨੂੰ ਪ੍ਰੀ-ਬਿਡ ਮੀਟਿੰਗ ਹੋਵੇਗੀ। ਇਸ ਤੋਂ ਬਾਅਦ ਫਾਇਨੈਂਸ਼ਲ ਬਿਡ ਖੋਲ੍ਹ ਕੇ ਆਖਰੀ ਫੈਸਲਾ ਲਿਆ ਜਾਵੇਗਾ।
PRTC ਰਾਹੀਂ ਖਰੀਦੀਆਂ ਜਾਣਗੀਆਂ ਵਾਤਾਵਰਣ-ਮਿੱਤਰ ਬੱਸਾਂ
ਇਹ ਸਾਰੀਆਂ ਮਿੰਨੀ ਬੱਸਾਂ ਪੇਪਸੂ ਰੋਡ ਟ੍ਰਾਂਸਪੋਰਟ ਕਾਰਪੋਰੇਸ਼ਨ (PRTC) ਵੱਲੋਂ ਖਰੀਦੀਆਂ ਜਾਣਗੀਆਂ ਅਤੇ BS-VI ਏਮੀਸ਼ਨ ਮਾਪਦੰਡਾਂ ਵਾਲੀਆਂ, ਵਾਤਾਵਰਣ-ਅਨੁਕੂਲ ਸਿਟੀ/ਅਰਬਨ ਬੱਸਾਂ ਹੋਣਗੀਆਂ। ਸਰਕਾਰ ਦਾ ਮਕਸਦ ਸਾਫ਼ ਸਫ਼ਾਈ ਨਾਲ ਨਾਲ ਪੇਂਡੂ ਖੇਤਰਾਂ ਵਿੱਚ ਰੋਜ਼ਗਾਰ ਦੇ ਮੌਕੇ ਵੀ ਪੈਦਾ ਕਰਨਾ ਹੈ।
505 ਮਿੰਨੀ ਬੱਸ ਆਪਰੇਟਰਾਂ ਨੂੰ ਮਿਲੇ ਪਰਮਿਟ
ਇਸ ਤੋਂ ਪਹਿਲਾਂ ਸਰਕਾਰ ਵੱਲੋਂ 505 ਮਿੰਨੀ ਬੱਸ ਆਪਰੇਟਰਾਂ ਨੂੰ ਪਰਮਿਟ ਜਾਰੀ ਕੀਤੇ ਜਾ ਚੁੱਕੇ ਹਨ। ਨਿਯਮਾਂ ਮੁਤਾਬਕ ਇੱਕ ਮਿੰਨੀ ਬੱਸ 5 ਤੋਂ 6 ਪਿੰਡਾਂ ਨੂੰ ਜੋੜੇਗੀ ਅਤੇ ਲਗਭਗ 35 ਕਿਲੋਮੀਟਰ ਦਾ ਰੂਟ ਕਵਰ ਕਰੇਗੀ। ਇਸ ਨਾਲ ਪੇਂਡੂ ਇਲਾਕਿਆਂ ਦੀਆਂ ਲਗਭਗ 19 ਹਜ਼ਾਰ ਕਿਲੋਮੀਟਰ ਲੰਬੀਆਂ ਸੜਕਾਂ ‘ਤੇ ਆਵਾਜਾਈ ਨੂੰ ਹੋਰ ਬਿਹਤਰ ਬਣਾਇਆ ਜਾਵੇਗਾ।
ਇਸ ਸਾਲ 1300 ਨਵੀਆਂ ਬੱਸਾਂ ਸ਼ਾਮਲ ਕਰਨ ਦੀ ਯੋਜਨਾ
ਪੰਜਾਬ ਸਰਕਾਰ ਨੇ ਇਸ ਸਾਲ ਲਗਭਗ 1300 ਬੱਸਾਂ ਖਰੀਦਣ ਦੀ ਯੋਜਨਾ ਬਣਾਈ ਹੈ। ਇਨ੍ਹਾਂ ਵਿੱਚ ਪੰਜਾਬ ਰੋਡਵੇਜ਼ ਅਤੇ PRTC ਲਈ 950 ਬੱਸਾਂ, ਕਿਲੋਮੀਟਰ ਸਕੀਮ ਤਹਿਤ 483 ਬੱਸਾਂ, ਨਾਲ ਹੀ ਇਲੈਕਟ੍ਰਿਕ ਅਤੇ ਮਿੰਨੀ ਬੱਸਾਂ ਸ਼ਾਮਲ ਹੋਣਗੀਆਂ। 100 ਮਿੰਨੀ ਬੱਸਾਂ ਛੋਟੇ ਅਤੇ ਪੇਂਡੂ ਰੂਟਾਂ ‘ਤੇ ਚਲਾਈਆਂ ਜਾਣਗੀਆਂ, ਜਿਸ ਨਾਲ ਲੋਕਾਂ ਦਾ ਸਫ਼ਰ ਆਸਾਨ ਅਤੇ ਸੁਵਿਧਾਜਨਕ ਹੋਵੇਗਾ।
