ਕੇਂਦਰ ਸਰਕਾਰ ਦੇ ਕਰਮਚਾਰੀਆਂ ਲਈ ਵਿੱਤ ਮੰਤਰਾਲੇ ਦੇ ਅਧੀਨ ਡਿਪਾਰਟਮੈਂਟ ਆਫ਼ ਫਾਇਨੈਂਸ਼ਲ ਸਰਵਿਸਿਜ਼ (DFS) ਨੇ ਇੱਕ ਨਵੀਂ ਵੱਡੀ ਸਹੂਲਤ ਦੀ ਸ਼ੁਰੂਆਤ ਕੀਤੀ ਹੈ। ਸਰਕਾਰ ਵੱਲੋਂ ‘ਕੰਪੋਜ਼ਿਟ ਸੈਲਰੀ ਅਕਾਊਂਟ ਪੈਕੇਜ’ ਲਾਂਚ ਕੀਤਾ ਗਿਆ ਹੈ, ਜਿਸ ਤਹਿਤ ਕੇਂਦਰੀ ਕਰਮਚਾਰੀਆਂ ਨੂੰ ਇੱਕ ਹੀ ਸੈਲਰੀ ਅਕਾਊਂਟ ਰਾਹੀਂ ਬੈਂਕਿੰਗ, ਬੀਮਾ ਅਤੇ ਕਾਰਡ ਨਾਲ ਜੁੜੀਆਂ ਕਈ ਸਹੂਲਤਾਂ ਮਿਲਣਗੀਆਂ।
ਇਹ ਅਕਾਊਂਟ ਪੂਰੀ ਤਰ੍ਹਾਂ ਜ਼ੀਰੋ ਬੈਲੈਂਸ ਹੋਵੇਗਾ, ਜਿਸ ਵਿੱਚ RTGS, NEFT ਅਤੇ UPI ਵਰਗੀਆਂ ਸੇਵਾਵਾਂ ਮੁਫ਼ਤ ਮਿਲਣਗੀਆਂ। ਇਸਦੇ ਨਾਲ ਹੀ ਹੋਮ ਲੋਨ, ਐਜੂਕੇਸ਼ਨ ਲੋਨ, ਵਾਹਨ ਲੋਨ ਅਤੇ ਪਰਸਨਲ ਲੋਨ ‘ਤੇ ਘੱਟ ਵਿਆਜ ਦਰ ਅਤੇ ਘੱਟ ਪ੍ਰੋਸੈਸਿੰਗ ਫੀਸ ਦੀ ਸਹੂਲਤ ਵੀ ਮਿਲੇਗੀ। ਲਾਕਰ ਕਿਰਾਏ ਵਿੱਚ ਛੋਟ ਅਤੇ ਚੈਕ ਬੁੱਕ ਵਰਗੀਆਂ ਹੋਰ ਬੈਂਕਿੰਗ ਸੁਵਿਧਾਵਾਂ ਵੀ ਇਸ ਪੈਕੇਜ ਦਾ ਹਿੱਸਾ ਹਨ।
ਬੀਮਾ ਸਹੂਲਤਾਂ ਦੀ ਗੱਲ ਕਰੀਏ ਤਾਂ ਇਸ ਅਕਾਊਂਟ ਨਾਲ 1.5 ਕਰੋੜ ਰੁਪਏ ਤੱਕ ਦਾ ਪਰਸਨਲ ਐਕਸੀਡੈਂਟ ਇੰਸ਼ੋਰੈਂਸ, 2 ਕਰੋੜ ਰੁਪਏ ਤੱਕ ਦਾ ਏਅਰ ਐਕਸੀਡੈਂਟ ਇੰਸ਼ੋਰੈਂਸ ਅਤੇ 20 ਲੱਖ ਰੁਪਏ ਤੱਕ ਦਾ ਟਰਮ ਲਾਈਫ ਇੰਸ਼ੋਰੈਂਸ ਮਿਲੇਗਾ। ਇਸਦੇ ਨਾਲ ਹੀ ਹੈਲਥ ਇੰਸ਼ੋਰੈਂਸ ਕਵਰ ਵੀ ਕਰਮਚਾਰੀ ਅਤੇ ਉਸਦੇ ਪਰਿਵਾਰ ਲਈ ਉਪਲਬਧ ਹੋਵੇਗਾ।
ਡੈਬਿਟ ਅਤੇ ਕਰੈਡਿਟ ਕਾਰਡ ਰਾਹੀਂ ਏਅਰਪੋਰਟ ਲਾਊਂਜ ਐਕਸੈਸ, ਰਿਵਾਰਡ ਪੁਆਇੰਟਸ ਅਤੇ ਕੈਸ਼ਬੈਕ ਵਰਗੀਆਂ ਸਹੂਲਤਾਂ ਵੀ ਦਿੱਤੀਆਂ ਜਾਣਗੀਆਂ। ਇਹ ਸਕੀਮ ਕੇਂਦਰ ਸਰਕਾਰ ਦੇ ਗਰੁੱਪ A, B ਅਤੇ C ਦੇ ਕਰਮਚਾਰੀਆਂ ਲਈ ਲਾਗੂ ਹੋਵੇਗੀ। ਸਰਕਾਰ ਨੇ ਕਰਮਚਾਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੇ ਮੌਜੂਦਾ ਸੈਲਰੀ ਅਕਾਊਂਟ ਨੂੰ ਪਬਲਿਕ ਸੈਕਟਰ ਬੈਂਕਾਂ ਵਿੱਚ ਅੱਪਗ੍ਰੇਡ ਕਰਵਾ ਕੇ ਇਸ ਨਵੀਂ ਸਹੂਲਤ ਦਾ ਲਾਭ ਲੈਣ।
