ਆਨਲਾਈਨ ਅਤੇ ATM ਰਾਹੀਂ ਲੈਣ-ਦੇਣ ਕਰਨ ਵਾਲੇ ਗਾਹਕਾਂ ਲਈ ਅਹਿਮ ਖ਼ਬਰ ਹੈ। ਸਟੇਟ ਬੈਂਕ ਆਫ਼ ਇੰਡੀਆ (SBI) ਨੇ ਆਪਣੇ ATM ਟ੍ਰਾਂਜੈਕਸ਼ਨ ਚਾਰਜਾਂ ਵਿੱਚ ਵਾਧਾ ਕਰ ਦਿੱਤਾ ਹੈ। ਮੁਫ਼ਤ ਟ੍ਰਾਂਜੈਕਸ਼ਨ ਦੀ ਸੀਮਾ ਪੂਰੀ ਹੋਣ ਤੋਂ ਬਾਅਦ ਹੁਣ ਦੂਜੇ ਬੈਂਕਾਂ ਦੇ ATM ਤੋਂ ਨਕਦੀ ਕੱਢਣਾ ਅਤੇ ਬੈਲੇਂਸ ਚੈੱਕ ਕਰਨਾ ਮਹਿੰਗਾ ਹੋ ਗਿਆ ਹੈ।
ਨਵੇਂ ਨਿਯਮਾਂ ਮੁਤਾਬਕ, ਮੁਫ਼ਤ ਲਿਮਿਟ ਤੋਂ ਬਾਅਦ ਹਰ ਨਕਦੀ ਟ੍ਰਾਂਜੈਕਸ਼ਨ ‘ਤੇ 23 ਰੁਪਏ (GST ਸਮੇਤ) ਚਾਰਜ ਲੱਗੇਗਾ, ਜਦਕਿ ਗੈਰ-ਵਿੱਤੀ ਲੈਣ-ਦੇਣ ਜਿਵੇਂ ਬੈਲੇਂਸ ਇੰਕੁਆਰੀ ਜਾਂ ਮਿੰਨੀ ਸਟੇਟਮੈਂਟ ਲਈ 11 ਰੁਪਏ (GST ਸਮੇਤ) ਦੇਣੇ ਪੈਣਗੇ। ਪਹਿਲਾਂ ਨਕਦੀ ਕੱਢਣ ‘ਤੇ ਇਹ ਚਾਰਜ 21 ਰੁਪਏ ਸੀ।
ਹਾਲਾਂਕਿ, ਇਹ ਵਧੇ ਹੋਏ ਚਾਰਜ ਬੇਸਿਕ ਸੇਵਿੰਗਜ਼ ਬੈਂਕ ਡਿਪਾਜ਼ਿਟ (BSBD) ਖਾਤਿਆਂ, SBI ਦੇ ਆਪਣੇ ATM ਦੀ ਵਰਤੋਂ ਕਰਨ ਵਾਲੇ ਗਾਹਕਾਂ ਅਤੇ ਕਿਸਾਨ ਕ੍ਰੈਡਿਟ ਕਾਰਡ (KCC) ਧਾਰਕਾਂ ‘ਤੇ ਲਾਗੂ ਨਹੀਂ ਹੋਣਗੇ।
SBI ਮੁਤਾਬਕ, ਇਹ ਫੈਸਲਾ ਇੰਟਰਚੇਂਜ ਫੀਸ ਅਤੇ ਸੰਚਾਲਕੀ ਖਰਚਿਆਂ ਵਿੱਚ ਵਾਧੇ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਲਿਆ ਗਿਆ ਹੈ। ਬੈਂਕ ਦੇ ਬਚਤ ਖਾਤਾ ਧਾਰਕਾਂ ਨੂੰ ਦੂਜੇ ਬੈਂਕਾਂ ਦੇ ATM ਤੋਂ ਮਹੀਨੇ ਵਿੱਚ ਪੰਜ ਮੁਫ਼ਤ ਟ੍ਰਾਂਜੈਕਸ਼ਨ ਦੀ ਸੁਵਿਧਾ ਮਿਲਦੀ ਰਹੇਗੀ, ਪਰ ਉਸ ਤੋਂ ਬਾਅਦ ਹਰ ਟ੍ਰਾਂਜੈਕਸ਼ਨ ‘ਤੇ ਨਵੇਂ ਦਰਾਂ ਅਨੁਸਾਰ ਚਾਰਜ ਲਾਗੂ ਹੋਣਗੇ।
